Maghiusa ang liboan ka mga boluntaryo ug blood donors sa tibuok nasud karong Nobyembre 14 alang sa Dugong Bombo 2026, usa sa pinakadakong blood donation drive sa Pilipinas nga dungan ipahigayon sa 25 ka key areas.
Gipahigayon sa Bombo Radyo Philippines, pinaagi sa Bombo Radyo Philippines Foundation, Inc. ug Philippine Red Cross, ang maong kalihokan isip kabahin sa kapin 20 ka tuig nga humanitarian service ug pagdasig sa boluntaryong pagdonar og dugo.
Nagtumong ang programa nga makatabang sa mga blood bank, ospital ug emergency response units pinaagi sa paghatag og dugang suplay sa dugo nga magamit sa mga pasyenteng nanginahanglan niini.
Subay sa tema nga “A Little Pain, A Life to Gain,” gipasiugda sa organisasyon nga bisan gamay lamang nga kasakit ang maagian sa pagdonar og dugo, dako kini og ikatabang sa pagluwas sa kinabuhi sa uban.
Kabahin usab kini sa pagsaulog sa ika-60 nga anibersaryo sa Bombo Radyo Philippines ug sa pagpadayon sa ilang serbisyo publiko ug bolunterismo sa tibuok nasud.
Sa laing bahin Giawhag usab sa Philippine Red Cross ang publiko nga moapil sa Dugong Bombo 2026 nga ipahigayon sa Bukidnon State University sa Malaybalay City karong Nobyembre 14 aron masiguro ang igong suplay sa dugo alang sa mga nanginahanglan niini.
Matod ni PRC Chairman Richard Gordon, dakong kaabag sa ilang organisasyon ang Dugong Bombo, samtang gidayeg usab niya ang mga boluntaryong donor nga mitawag niyang mga bayani sa modernong panahon tungod sa ilang pagtabang sa pagluwas og kinabuhi.
Samtang giawhag usab ni Malaybalay City Mayor Jay Warren R. Pabillaran ang mga departamento sa lokal nga panggamhanan nga dasigon ang ilang mga kwalipikadong empleyado sa pagdonar og dugo isip kabahin sa maong kalihokan.

