Gidakop ang usa ka 35-anyos nga lalaki human makumpiskahan og dili lisensyadong armas sa border control checkpoint sa Sitio Ticub, Barangay Pamotolon, Kalilangan, Bukidnon, pasado alas-6:30 sa gabii niadtong milabay’ng adlaw.
Giila ang suspetsado nga si alyas “Niel,” usa ka heavy equipment technician ug residente sa Maramag, Bukidnon.
Base sa report, gipara sa mga sakop sa 1004th Maneuver Company sa Regional Mobile Force Battalion 10 ang gimaneho niyang motorsiklo tungod sa wala pagsul-ob og helmet.
Apan namatikdan sa mga pulis ang matud pa kuptanan sa armas nga mitibaw sa iyang hawak.
Sa pagsusi, narekober gikan sa suspetsado ang usa ka kalibre .45 nga pistola, duha ka magazine ug tulo ka bala.
Wala usab kini makapakita og mga dokumento nga nagpamatuod nga rehistrado ang armas ug awtorisado siyang magdala niini.
Atubangon sa suspetsado ang kasong paglapas sa Republic Act 10591 o Comprehensive Firearms and Ammunition Regulation Act.
Anaa na siya sa kustodiya sa Kalilangan Municipal Police Station alang sa dokumentasyon ug hustong disposisyon, samtang ipaubos sa eksaminasyon ang nakumpiskang armas ug mga bala.
Gipasalig usab ni PRO-10 Regional Director PBGEN Nestor C. Babagay Jr. nga ipadayon ug palig-onon sa kapulisan ang mga checkpoint ug border security operations aron mapugngan ang paggamit sa ilegal nga armas sa mga kriminal nga kalihokan.

