Nagpabilin ang kabalaka sa katawhan kalabot sa integridad sa gipahigayong surprise drug test sa tanang Job Order ug Casual employees sa Local Government Unit (LGU) sa Malaybalay City, human kini molungtad pa ug pila ka adlaw tungod sa kadaghan sa mga empleyado.
Gipatuman ang maong drug screening niadtong Hulyo 8, 2025, isip kabahin sa kampanya sa LGU batok sa droga sulod sa ilang hanay. Apan, giquestion sa pipila ka sektor ang pagkaepektibo sa operasyon tungod sa posibilidad nga makaandam o makalikay ang mga empleyado nga wala pa matesting, nga posibleng makalikay sa positibong resulta.
Nahinumduman nga niadtong Hunyo, usa ka Job Order ug usa ka regular nga empleyado sa LGU ang nadakpan sa drug buy-bust operation. Kini maoy nagtukmod sa LGU sa paghimo sa kalit nga drug test aron masumpo ang problema sa drug involvement sa sulod sa lokal nga pamahalaan.
Bisan pa sa tumong sa LGU nga mapalimpyo ang serbisyo publiko, nagpabilin ang mga pangutana kung giunsa pagsiguro ang integridad ug pagka-surprise sa testing, ilabi na nga napahibalo na sa mga empleyado nga wala pa matestingi. Gilauman sa katawhan nga mas mapalig-on pa ang mekanismo sa drug screening aron malikayan ang posibleng manipulasyon ug mapadayon ang ilang pagsalig sa LGU