Nagtuo si human rights lawyer Atty. Neri Colmenares nga maglisod ang kampo ni Vice President Sara Duterte sa pagdepensa batok sa alegasyon sa unexplained wealth tungod kay secondary witnesses lamang ang ilang gipaabot nga ipresentar sa impeachment trial.
Matod ni Colmenares, kulang sa direktang kahibalo bahin sa maong mga alegasyon ang mga testigo nga maghatag lamang og konteksto o mokuwestiyon sa ebidensyang gipresentar sa prosecution, nga naglakip sa giingong unexplained wealth nga mokabat sa ₱800 milyon hangtod ₱1.5 bilyon.
Iyang gisugyot nga mas maayong si Duterte mismo ang motestigo aron direktang matubag ang mga pangutana ug mapatin-aw ang gigikanan sa iyang mga kabtangan, bisan pa og adunay risgo nga maglisod kini sa pagpasabot sa mga alegasyon.
Gilauman nga ipadayon ang impeachment trial karong Nobyembre 9, diin magsugod ang presentasyon sa mga testigo ug ebidensya sa kampo sa depensa.