Naglaum ang House prosecution panel nga dili na masangit sa laing mosyon o isyu ang pagpadayon sa impeachment trial batok kang Vice President Sara Duterte karong Nobyembre 9, aron matutokan na ang nahibiling alegasyon sa unexplained wealth.
Matod ni House prosecutor Atty. Jay. Tolosa Jr., mas maayo nga diretso nang hisgotan ang nahibiling Article 2 imbes nga balikon ang mga artikulong wala na ipadayon sa prosecution, nga posibleng hinungdan lamang sa dugang paglangan sa pagdungog.
Samtang, gikuwestiyon ni House prosecutor ug Bicol Saro Party-list Representative Terry Ridon ang kapasidad sa mga testigong ipaatubang sa depensa nga motubag sa tagsa-tagsa nga alegasyon ug ebidensyang gidawat na sa Senate Impeachment Court.
Gilauman nga sugdan sa depensa ang pagpresentar sa ilang mga testigo ug ebidensya sa pagbalik sa impeachment trial karong Lunes, Nobyembre 9, samtang tumong sa prosecution nga mahuman ang paghisgot sa nahibiling alegasyon sa dili pa matapos ang tuig.