Gihagit ni House impeachment adviser ug spokesperson Robert Ace Barbers ang defense team ni Vice President Sara Duterte nga direktang tubagon ang mga dokumento ug financial records nga gipresentar sa prosecution atol sa impeachment trial.
Matud ni Barbers, dili ang kadaghan sa mga testigo, kalawom sa argumento o pagsupak sa proseso ang sukdanan sa kamatuoran, kondili ang katakos sa depensa sa pagpasabot sa mga numero sa maong mga dokumento.
Lakip sa gustong maklaro sa prosecution kung nagtugma ba ang gideklarang bahandi ug mga utang sa bise presidente sa iyang Statement of Assets, Liabilities and Net Worth o SALN, ug kung igo ba ang iyang gideklarang kita aron ipasabot ang natigom niyang mga kabtangan.
Gipadayag ni Barbers nga kung limpyo ug husto ang mga transaksiyon, kinahanglan mapatin-aw ang matag numero pinaagi sa klarong pagpasabot ug ebidensiya.
Dugang pa niini nga dili angay mangibabaw ang politika ug pagdapig sa partido sa paghusay sa kaso, ug kinahanglan patas nga timbangon sa mga senator-judge ang mga ebidensiya subay sa Konstitusyon.