Nasiguro sa Filipina tennis star Alex Eala ang pagsibog sa Round of 16 sa Hong Kong Open human gipildi si Australian player Emerson Jones pinaagi sa straight sets, 6-4, 6-3, sa Round of 32 niadtong Martes sa Victoria Park Tennis Stadium.
Una nang gikatakdang makigsangka si Eala kang American player nga si Alycia Parks apan mipahawa kini sa torneyo, hinungdan nga gipuli isip lucky loser si Jones nga napildi sa qualifying round.
Gipakita dayon ni Eala ang agresibong dula ug nakalamang og 3-0 sa unang set, apan nakabawi si Jones pinaagi sa sunod-sunod nga service breaks.
Bisan pa niini, nakuha gihapon sa Pinay tennis star ang unang set, 6-4.
Mas nakontrolado ni Eala ang ikaduhang set diin nakalamang kini og 4-1 pinaagi sa importanteng breaks.
Bisan misulay pa og bawi si Jones, apan wala na kini nakapugong kang Eala sa pagsira sa set, sa iskor nga 6-3.
Sunod nga atubangon ni Eala sa Round of 16 si Tereza Valentova sa Czech Republic, diin aduna 2-0 nga bentaha sa ilang head-to-head record sa WTA Tour.