Giawhag ang mga ginikanan ug magtutudlo nga mas hatagan og pagtagad ang mental health sa mga tin-edyer, ilabi na kung adunay kalit ug dakong kausaban sa ilang pamatasan nga posibleng timailhan sa problema sa pangisip.
Matud pa sa usa ka mental health expert, lakip sa mga posibleng hinungdan sa dili maayong pamatasan sa mga tin-edyer ang depresyon, pagpang-abuso, problema sa pamilya ug mga kasinatian sa palibot.
Gipasabot usab sa eksperto nga kinahanglan bantayan ang mga kausaban sa adlaw-adlaw nga buluhaton sa bata, sama sa pagkawala sa interes sa eskwela, kanunay nga pagkatulog ug pagpasagad sa kaugalingong kahinlo.
Dugang pa niya, importante usab ang papel sa mga magtutudlo sa pag-ila sa mga posibleng problema sa pangisip sa mga estudyante, gawas sa ilang naandang pagtudlo ug paghatag og grado.