Gipasabot sa Simbahang Katolika nga ang pagsaulog sa All Souls’ Day matag Nobyembre 2 usa ka pagpahayag sa gugma ug paghinumdom sa mga minahal nga nangamatay pinaagi sa pag-ampo alang sa ilang mga kalag.
Matud pa ni Fr. Cleb, importante ang pag-ampo alang sa mga namatay tungod kay usa kini ka paagi sa pagpangayo sa kaluoy sa Diyos ug paglaom nga mahinloan ang ilang mga kalag aron makaangkon sa kinabuhing dayon.
Gipasabot usab sa pari nga ang purgatoryo usa ka kahimtang sa paghinlo sa mga kalag sa dili pa sila makaadto sa langit, samtang lahi kini sa impyerno nga nagpasabot sa walay kataposang pagkabulag sa Diyos.
Samtang, gipatin-aw usab niya nga ang pagdagkot og kandila ug pagbutang og mga bulak sa lubnganan dili direktang kondisyon sa kaluwasan sa mga kalag, kondili simbolo sa pag-ampo, pagpasidungog ug paghigugma sa mga minahal nga nangamatay.