Gilauman nga mag-atubang og dakong hagit ang kampo ni Vice President Sara Duterte sa pagpatin-aw sa mga alegasyon sa unexplained wealth sa iyang impeachment trial, nga ipadayon sa Senado sa Nobyembre 9.
Sumala ni Atty. Oscar Moreno, law professor ug corporate lawyer, anaa na sa depensa ang responsibilidad sa pagpatin-aw sa tinubdan sa bahandi ni Duterte human mapresentar sa prosecution ang ilang mga ebidensiya.
Gipasabot usab ni Moreno nga lakip sa gisusi sa prosecution ang mga rekord sa SALN, bank deposits, income ug report sa Anti-Money Laundering Council aron masuta ang tinuod nga kahimtang sa panalapi sa bise presidente.
Matud pa ni Moreno, mahimo usab nga ipresentar sa depensa ang prenuptial agreement aron ipatin-aw ang pagpanag-iya sa mga kabtangan ni Duterte ug sa iyang bana nga si Manases Carpio.
Bisan pa niini, gipasiugda sa abogado nga importante nga makahatag ang depensa og lig-on nga katin-awan sa kalainan sa deklaradong kinitaan ug sa natigom nga bahandi.