Gikabalak-an ni economic expert Ray Talimio Jr. ang posibleng dugang kabug-at sa utang sa Pilipinas, nga mikabat na sa ₱19.6 trilyon, ilabina kon dili kini magamit sa mga serbisyo ug proyekto nga direktang makabenepisyo sa katawhan.
Matud ni Talimio, dugang nga nagpasamot sa utang sa nasud ang paghuyang sa piso batok sa dolyar, samtang nagpabiling hagit ang pagpalambo sa kita sa gobyerno ug ang pagkontrol sa paggasto niini.
Gipahayag usab ni Talimio nga kinahanglan masiguro nga ang pondo sa gobyerno magamit sa produktibong mga kalihokan, lakip ang pagtabang sa mga mag-uuma ug gagmayng negosyo aron mapalig-on ang lokal nga ekonomiya.
Giduso usab niini ang mas hugot nga pagdumala sa paggasto sa gobyerno ug pagpatuman sa mga reporma aron malikayan ang pag-usik sa pondo tungod sa korapsyon ug kuwestiyonableng mga proyekto.
Samtang, positibo nga giila ni Talimio ang pag-abot sa ekonomiya sa Northern Mindanao sa ₱1 trilyong marka, nga nahimong ikaunom sa kinadak-ang ekonomiya sa 18 ka rehiyon sa nasud.
Apan gipasidaan niya nga kinahanglan pa kining mapalig-on pinaagi sa pagpaubos sa inflation, pagpalambo sa agrikultura ug pagpakunhod sa kakabos.