Gitugotan nga motambong isip mga tigbantay ang mga representante sa Civil Society Organizations (CSOs) sa deliberasyon sa Bicameral Conference Committee alang sa panukalang ₱7.2-trilyong national budget sa 2027, aron masiguro ang transparency ug masuta ang posibleng kwestyonableng alokasyon sa pondo.
Matod ni Senate Finance Committee Chairperson Senator JV Ejercito, giila nila ang mga rekomendasyon sa CSOs ug watchdog groups, ilabina sa pagsusi sa mga dokumento ug pag-andam sa committee report ug bicam proceedings.
Kini human gipunting sa People’s Budget Coalition ang kapin ₱1 trilyon nga mga kahina-hinalang alokasyon sa panukalang budget atol sa pagdungog niadtong Oktubre 26. Apan, gipanalipdan sa mga lider sa Kamara ang ilang mga amyenda ug miingon nga gibase kini sa mga sugyot sa mga ahensya sa gobyerno.
Gidasig usab ni Ejercito ang publiko nga gamiton ang digital tools nga gihimo sa mga CSO aron masusi ang budget ug matino ang mga posibleng kuwestiyonableng proyekto, lakip ang mga dugang nga alokasyon sa katapusang yugto sa deliberasyon.
Samtang, gikumpirma sa senador nga ipasalida gihapon og live stream ang bicam proceedings sama sa miaging tuig. Apan, pagatun-an pa nila ang sugyot ni Senator Panfilo “Ping” Lacson nga magpadayon ang live streaming bisan suspendido ang sesyon, tungod sa posibilidad nga masayop og pagsabot ang publiko sa mga panaghisgot sa mga mambabatas.
Sa pagkakaron, gitapos na sa Senate Finance Committee ang committee report ug gilauman nga pormal nga ipresentar ni Ejercito sa plenaryo karong bulana ang panukalang 2027 General Appropriations Bill.