Murder suspect sa Florida, mitanyag nga muangkon sa kaso kung hatagan kini ug cheesesteak sandwich

Usa ka 74-anyos nga lalaki nga giakusahan sa pagpatay sa usa ka babaye sa Florida, Estados Unidos ang mitanyag nga moangkon sa krimen kapalit sa Philly cheesesteak sandwich, french fries ug softdrinks.

Ang suspek nga si Robert Kessler giakusahan sa pagpatay kang Stephanie Crone-Overholt, 47-anyos, niadtong 2021.

Atol sa pagpili sa mga hurado, miingon si Kessler nga andam siyang moangkon sa sala ug modawat sa silot nga tibuok kinabuhi nga pagkabilanggo kon hatagan siya sa iyang gipangayong pagkaon.

Apan gisalikway sa huwes ang maong hangyo kay dili angay nga pagkaon ang mahimong baylo sa pag-angkon sa sala.

Gibawi ni Kessler ang iyang tanyag ug gipadayon ang proseso sa pagpili sa mga hurado. Wala pa siya mapamatud-ang sad-an sa korte.