Nasulbad na ang dili pagkasinabtanay tali sa Bukidnon Provincial Medical Center (BPMC) ug ni Barangay Casisang Captain Gregorio D. Jaroy kalabot sa reklamo sa giingong dili maayong pagtratar sa usa ka pasyente, human sa ilang panag-istorya uban sa mga kawani sa ospital.
Gipadayag ni BPMC Chief Dr. Miguel Antonio Prantilla nga nagkasinabot ug nagkapasayloay na ang mga nalambigit sa insidente, lakip ang pagsabot ni Jaroy sa patient navigation and referral system nga ipatuman aron masiguro nga madala ang mga pasyente sa ospital nga adunay bakanteng higdaanan ug tukmang kagamitan sa pag-atiman.
Matud ni Prantilla, nagpabiling taas ang gidaghanon sa mga pasyente sa BPMC nga adunay kapasidad nga 150 ka higdaanan, apan miabot sa 270 ang ilang kasamtangang census. Tungod niini, usahay maglisod ang ospital sa paghatag sa gikinahanglang pag-atiman, samtang nagpadayon sila sa pagpauswag sa serbisyo ug paghatag og basic customer service training sa mga kawani.
Sa laing bahin, giawhag ni Prantilla ang publiko nga idirekta sa complaint box o suggestion box ang mga reklamo aron matubag kini sa hustong paagi. Gipasabot usab niya nga gikinahanglan ang pagpalig-on sa primary healthcare ug pagdugang o pagpalapad sa mga ospital sa Bukidnon tungod sa kakulang sa mga higdaanan.
Kahinumduman nga unang nagpasaka og reklamo si Kapitan Jaroy kalabot sa giingong dili maayong pagtratar sa usa ka pasyente sa BPMC, nga nahimong hinungdan sa diskusyon ug batikos sa social media.