Miinstalar ang Bureau of Internal Revenue (BIR) Revenue District Office No. 99, og taxpayer assistance kiosk aron mapauswag ang serbisyo ug mapaayo ang kasinatian sa mga taxpayer.
Matud ni Revenue District Officer Mampay U. Pangcoga, nga ang kiosk nagtumong sa episyenteng tax compliance pinaagi sa paghatag og akses sa impormasyon, online services, ug usa ka plataporma alang sa pag-file og mga reklamo.
Giingong kini kabahin sa mga paningkamot sa BIR sa modernisasyon aron maghatag og mas responsibong mga serbisyo gamit teknolohiya.
Dugang pa niini, ang BIR Malaybalay nagpadayon sa pag-implementar sa Gender and Development (GAD) Focal Point System aron mapalambo ang gender equality sa ilang mga operasyon, subay sa mga nasudnong mandato sa pag-integrate sa GAD sa tanang ahensya sa gobyerno.