Nanawagan si US President Donald Trump sa tanang mga nasud nga sakop sa International Criminal Court (ICC) nga pormal nga mobiya sa maong tribunal, nga iyang gihulagway nga usa ka “out-of-control” ug “rogue institution”.
Sa iyang diskurso sa United Nations General Assembly sa New York, gipadayag ni Trump nga dili gayud motugot ang Estados Unidos nga ang ilang mga sundalo o lungsuranon ipailalom sa imbestigasyon o paghukom sa giisip niyang anti-American tribunal nga walay hurisdiksyon sa ilang nasud.
Sa taho nga nadawat sa Bombo Radyo, nagsumikad ang maong kontrobersya human sa arrest warrant nga giluwatan sa ICC batok kang Israeli Prime Minister Benjamin Netanyahu—usa sa pangunang alyado sa US—ug sa imbestigasyon sa korte sa mga lihok sa sundalong Amerikano sa Afghanistan, nga miresulta sa pagpataw sa administrasyong Trump og sanksyon batok sa mga opisyal sa maong korte.