Gipadayag sa Department of Justice (DOJ) nga posible nga daghan pa nga personalidad gawas sa usa ka ‘celebrity’ ang posibleng nalambigit sa pagkawala sa mga biktima nga sabungero.
Matud ni Justice Secretary Jesus Crispin Remulla, basin aduna pa’y uban nga mga iladong tawo nga gi-imbestigahan kabahin sa kaso sa mga nawawalang sabungero.
Apan miingon ang kalihim nga dili pa siya mopamatuod o mokomentaryo bahin sa isyu kung tinood ba nga usa ka kilalang babayeng artista ang usa sa mga kasabwat sa ‘mastermind’.
Dugang pa niini, kinahanglan pa nga masuta ug ma-verify ang maong impormasyon busa wala pa siyay gustong isulti kabahin niini. Apan gipadayag asa kalihim nga posible nga daghan pa nga mga indibidwal ang nalambigit sa kaso sa pagkawala sa mga sabungero.
Gumikan niini, gipahibalo sa kalihim nga daghan na karon og mga kalamboan ang ilang ginahimo sa imbestigasyon, ilabi na sa mga impormasyon nga ilang gina-review ug ginatan-aw.
Gihangyo usab niini ang publiko sa dugang pasensya ug oras aron matino gayud ang tinuod kabahin sa maong kaso.
Kalabot sa maong isyu, gikumpirma nga ang kagamhanan naghangyo na sa gobyerno sa Japan aron mangayo og tabang pinaagi sa sulat. Tinguha sa DOJ nga masuta ang kamatuoran sa mga gisulti sa testigong nailhan nga si alyas ‘Totoy’.
Kabahin niini, gihangyo ni Secretary Remulla ang kooperasyon uban sa Philippine Navy, Philippine Coast Guard, ug Department of Environment and Natural Resources alang sa pagsulbad sa maong insidente.