Nasakmit ni Pinoy woodpusher Alekhine Nouri ang usa ka bulawan ug usa ka silver nga medalya atol sa Asian Juniors Chess Championship nga gipahigayon sa Citrus Hotel Waskaduwa, Sri Lanka.
Gipildi sa 19-anyos nga FIDE Master ang Indian International Master nga si Kashish Manoj Jain sa ikapito ug katapusang round aron makatigom og 6.5 ka puntos ug midaug sa torneyo nga naggamit sa seven-round Swiss system uban sa time control nga 15 minutos + 10 segundos increment.
Nagbahin sa top spot si Nouri ug ang Indonesian player nga si Nayaka Bughidharma nga pareho og 6.5 puntos, apan nahimutang sa ikaduhang pwesto si Nouri sa Blitz event human sa tie-break.
Nakakuha usab og bronze medal si John Jerish Velarde sa Rapid division human iyang gipildi ang second seed nga si IM S. Aswath sa India.
Nakatigom kini og 6 ka puntos ug naplastar sa ikatulo nga puwesto. Nakaparehas og puntos si Velarde kang FM Mahendru Jaiveer sa India, apan tungod sa mas taas nga tie-break score, nakuha sa Pinoy ang bronze medal.
Hapit makab-ot sa Pilipinas ang usa ka 1-2 finish sa maong torneyo. Gisugdan usab ni Nouri ug Velarde ang ilang kampanya sa standard division sa maong kompetisyon.
Sa unang round, gilupig ni Nouri si AFM Yeshan Perera sa Sri Lanka, samtang gibuntog ni Velarde si Rashmika Heshan Rajapakshe sa parehong nasud. Nagpadayag kini sa padayon nga kusog sa mga Pinoy sa natad sa international chess.