Nakompiska ang P20 Milyones nga kantidad sa smuggled nga sigarilyo sa Misamis Oriental.
Matud pa ni Police Major Joann Navarro, tigpamaba sa PRO-10, nga sa unang adlaw sa paglingkod sa bag-ong liderato sa Police Regional Office 10 (PRO-10) nga Regional Director PBGEN Rolindo Suguilon, malampuson ang mga operasyon batok sa smuggled cigarettes diin nakompiska og 20 milyones nga kantidad sa Manticao, Misamis Oriental, ug uban pang mga operasyon nga nagresulta sa pagkasikop sa mga suspek nga adunay kalabutan sa mga daotang binuhatan.
Gibutyag usab niini, nga kasamtangang gaobserba pa anfg bag-ong lingcod nga regional Director ug wala pay reshuffling sa mga field commanders sa ahensya.
Dugang pa ni PMaj. Navarro, hugot nga pagatumanon sa kapulisan ang 3-5 minutes response time nga gi-mando ni PNP Chief Police General Nicolas Torre III.
Nagtuo ang PRO-10 nga pinaagi sa pagpahingusog sa police visibility sa mga kahitaasan, mapalambo ang operasyon sa mga mando ug ang kapasidad sa pagresponde sa krimen.
Subay sa direktiba ni PNP Chief Torre, mas mahatagan og higayon ang kapulisan nga ipakita ang ilang pagpaningkamot ug determinasyon sa pagserbisyo sa katawhan.
Gipasalig usab nila nga ipadayon ang pagmonitor ug pagpatuman sa mga operasyon batok sa mga illegal nga binuhatan.