Arestado ang usa ka 27-anyos nga IT professional nga babae human sa gipahigayong entrapment operation sa PNP Anti-Cybercrime Group (PNP-ACG) tungod sa pagbaligya og mga ilad o pekeng concert ticket sa bantogang K-pop group nga BTS.
Sumala sa kapulisan, nagtanyag ang suspek sa social media og mga ticket nga nagkantidad og ₱14,200 matag usa. Apan nadiskobrehan sa usa sa mga biktima nga ang parehong ticket nga iyang gibayran og ₱10,000 nga down payment gibaligya man usab diay sa uban pang mga pumapalit.
Tungod niini, dali nga nagpatabang ang biktima sa mga awtoridad nga miresulta sa pagkahulog sa suspek sa maong operasyon. Kasamtangang nag-atubang na ang suspek og kasong Swindling/Estafa ubos sa Revised Penal Code ug paglapas sa Cybercrime Prevention Act of 2012.