Gikaiingong si Vice President Sara Duterte mismo ang miapruba sa mga dokumento nga gigamit sa pagpagawas ug pag-liquidate sa confidential funds sa Office of the Vice President (OVP) alang sa unang tulo ka quarter sa 2023, sumala sa mga dokumentong gihisgutan atol sa ika-12 nga adlaw sa impeachment trial.
Sa eksklusibong pakighinabi sa Bombo Radyo, miingon si Lanao del Sur Rep. Zia Alonto Adiong nga base sa testimonya ni state auditor Atty. Roderick Wamil, ang mga disbursement vouchers, accomplishment reports, utilization reports, ug physical ug financial plans pawang adunay pirma ug pag-apruba ni Vice President Sara Duterte.
Dugang pa niini, nakamatikod ang Commission on Audit (COA) og mga kalainan sa liquidation reports, lakip ang mga giingong paggasto nga wala motuman sa Joint Circular.
Tungod niini, mi-isyu ang COA og Audit Observation Memorandum ug sa ulahi Notice of Suspension human mapakyas ang OVP sa pagsumite sa gikinahanglang mga dokumento sulod sa gitakdang 15 ka adlaw.