MALAYBALAY CITY — Gipahugtan sa Traffic Management Center (TMC) sa Malaybalay City ang pagpatuman sa mga balaod sa trapiko pinaagi sa padayon nga operasyon batok sa mga motorsiklong nag-open pipe o “bora-bora”, illegal parking, ug uban pang mga paglapas aron masiguro ang kaluwasan sa kadalanan.
Gipadayag ni Traffic Operations Officer I Ernie “Boy” Neri nga nagtinabangay ang TMC, Land Transportation Office (LTO), ug Philippine National Police (PNP) sa regular nga pag-monitor, ilabina matag Sabado alang sa kampanya batok sa open pipe. Ang masakpan pagamultahan og ₱3,000 ug tangtangon ang iligal nga muffler, samtang ang dili makabayad mahimong mopahigayon og community service. Samtang, ang multa sa illegal parking nagkantidad gikan ₱1,000 hangtod ₱3,000 depende sa dapit nga nalapasan.
Gipadayag usab ni Neri nga ang mechanical defects sa sakyanan ug ang pagmaneho nga nakainom og makahubog nga ilimnon ang kasagarang hinungdan sa mga aksidente sa dakbayan. Tungod niini, gikatakda usab nilang ipatuman sa dili madugay ang paggamit og speed gun sa higayon nga makompleto na ang pagtaod sa mga speed limit signages, uban sa padayon nga suporta ug kagamitan nga gihatag sa Lokal nga Panggamhanan sa Malaybalay ngadto sa TMC.