Gipatin-aw ni kanhi Integrated Bar of the Philippines (IBP) President Atty. Eddie Cuaresma nga ang opisyal nga audit report sa Commission on Audit (COA) ug lig-ong ebidensya gihapon ang magsilbing bugtong pundasyon sa kaso batok kang Vice President Sara Duterte — alang usab sa gipahigayon kagahapon nga impeachment trial may kalabotan sa kontrobersyal nga paggamit sa confidential funds.
Sa usa ka pakighinabi sa Bombo Radyo, gipasabot ni Cuaresma nga bisan pa man kon nakapukaw og dakong pagduda ang alegasyong paggasto sa ₱125-milyong confidential funds sulod lamang sa 11 ka adlaw, dili gihapon kini igo nga pamatuod sa iregularidad kon walay pormal nga dokumentasyon. Kinahanglan gihapon nga ipresentar sa COA ang ilang pormal nga findings aron matino kon nasunod ba ang hustong proseso sa paggasto sa kwarta sa gobyerno.
Gipasidaan usab sa legal expert nga kon magpagawas ang COA og Notice of Disallowance ug mapakyas ang opisina sa Bise Presidente sa pagpasabot niini, mahimo kining basihan sa pagsang-at og bug-at nga mga kaso sama sa plunder, malversation, o paglapas sa Anti-Graft and Corrupt Practices Act. Busa, gipahinumdoman ni Cuaresma nga ang impeachment proceedings kinahanglang magsubay gayud sa dokumentadong kamatuoran ug dili sa pulos ra haka-haka.