Gihatagan og otoridad si Gobernador Rogelio Neil P. Roque sa Sangguniang Panlalawigan sa Bukidnon aron makasulod sa nagkalain-laing Memorandum of Agreement ug Deed of Donation, human giaprobahan sa kapulungan ang tulo ka resolusyon nga gipresentar ni Board Member Joseph “Dodo” Palmada sa Ikatulong Distrito.
Lakip niini ang Item Number 21, nga naglangkob sa Memorandum of Agreement tali sa Provincial Government of Bukidnon ug LGU San Fernando.
Giaprobahan usab ang Item Number 22, alang sa Deed of Donation nga nagkantidad og P999,750 para sa Liga ng mga Barangay sa Unang Distrito, nga gilangkuban sa Baungon, Sumilao, Manolo Fortich, Talakag, Libona ug Malitbog.
Samtang, giaprobahan usab ang Item Number 23, alang sa Deed of Donation tali sa probinsya ug Liga ng mga Barangay–Lantapan Chapter, nga nagkantidad og P690,325 alang sa 15 ka set sa desktop computer ug printer.
Ang maong mga kagamitan gitumong sa pagpalambo sa online government services ug administrasyon sa mga barangay sa Lantapan.