Gibarugan sa Malacañang nga uyon sa balaod ang paghatag ni Pangulong Ferdinand Marcos Jr. og otorisasyon sa Bureau of Internal Revenue (BIR) aron ipagawas ang tax records nila ni Vice President Sara Duterte ug Atty. Manases “Mans” Carpio sa Senate impeachment court.
Matud ni Palace Press Officer Claire Castro, katungod ni Carpio ang pagsang-at og legal nga aksyon kon gusto niyang kwestyunon ang pagpagawas sa ilang tax records.
Gihimo sa Malacañang ang pamahayag human giingon ni Carpio nga adunay mga legal nga isyu nga kinahanglan una nga masulbad may kalabotan sa otorisasyon sa Pangulo ngadto sa BIR.
Bisan pa niini, nagpabiling lig-on ang Palasyo nga nagsunod lamang ang Pangulo sa naglungtad nga balaod ug hustong proseso aron mapadayag ang kamatuoran.
Sumala kang Castro, kon walay gitaguan ug walay makita nga iregularidad sa mga rekord, wala matud angay kabalak-an sila Carpio ug Duterte sa pag-usisa niini.
Dugang pa niya, mahimo pa gani nilang ikagarbo nga ang ilang mga kita nakuha pinaagi sa limpyo ug legal nga pamaagi.