Padayon ang pagsaka sa ihap sa mga adunahan nga midagsa sa Pilipinas, sumala sa pinakabag-ong Henley Private Wealth Migration Report 2025.
Ang maong datos gipagula sa investment migration consultancy firm nga Henley & Partners niadtong Martes.
Matud sa report, aduna nay 12,800 ka high-net-worth individuals (HNWIs) sa Pilipinas lakip na ang 70 ka centi-millionaires kon mga tawo nga adunay kapin sa $100 milyon ang bahandi o katugbang kini sa 12 ka bilyonaryo nga personahe.
Bisan pa man wala pa ang Pilipinas sa listahan sa mga top destinations sa kalibutan alang sa mga migrante nga milyonaryo, nagkanayon si Scott Moore, managing director sa Henley & Partners sa Southeast Asia, nga nagtukod na kini og lig-on nga pundasyon alang sa umaabot nga investment migration sa nasud.
Timailhan matud pa kini nga nagkalig-on ang sistema sa ekonomiya sa Pilipinas alang sa katawhan diin makasalig ang mga investors nga musugal sa ilang negosyo diin makatabang usab sa mga Pilipino.