Posibleng mag-atubang sa pagkabangkarote o Bankruptcy ang mga electric cooperative sa nasud kung tangtangon ang pagkolekta sa system loss nga walay klarong mekanismo ug subsidiya gikan sa gobyerno.
Kini ang pasidaan Christopher Dulfo ang general Manager sa Bukidnon II electric Cooperative taliwala sa hugot nga panawagan sa administrasyon nga wagtangon na ang giingong dugang bayronon sa kuryente alang sa mga konsumidor.
Gipadayag niini nga ang system loss dili usa ka tinuyo o malisyosong patong, kondili usa ka natural o technical loss gikan sa mga linya sa National Grid Corporation of the Philippines (NGCP) paingon sa mga substation ug sa mga panimalay.
Tungod niini, gikabalak-an nga mapugos ang mga kooperatiba sa paghunong sa ilang mga programa sa pag-apud-apod og kuryente sa mga hilit ug lagyong mga lugar gumikan kini maoy maghatag og dugang pagkabalda sa sistema.
Samtang gipadangat ang hanyo nga maminusan ang galastuhan sa publiko, gihangyo karon ang gobyerno nga tun-an pag-ayo ang lakang pinaagi sa paghatag og saktong subsidiya o pagtan-aw sa ubang mga alternatibo sama sa pagpaubos sa value-added tax aron masiguro ang padayon nga operasyon ug kalig-on sa mga electric cooperative sa probinsya.
Kini subay sa nahimong reaksiyon o pamahayag mga kooperatiba human gianunsyo ni Presidente Ferdinand Marcos Jr., ang pagtangtang sa system loss atol sa ikalima State of the Nation Address niini kagahapong adlawa.