Gikalipay sa House Prosecution Panel ang desisyon sa Senate Impeachment Court nga ipagawas ang subpoena alang sa bank records, AMLC reports, ug tax documents ni Vice President Sara Duterte ug sa iyang bana nga si Atty. Manases Carpio.
Matud sa prosekusyon, dakong kalampusan kini alang sa ilang panig tungod kay makatabang ang mga rekord sa pagpresentar og dugang ebidensya sa alegasyon sa “unexplained wealth” batok sa Bise Presidente.
Gipasiugda sa korte nga ang mga dokumento nga gipangayo adunay klaro nga paghulagway, dali mailhan, ug adunay prima facie relevance sa mga alegasyon sa impeachment case.
Gipasabot usab nga dili mahimong babag ang bank secrecy laws ug AMLA confidentiality provisions sa gahum sa Senado isip impeachment court.
Para sa prosekusyon, ang pagpagawas sa maong mga rekord makatabang sa pagpakita sa mas klaro nga hulagway sa tinubdan sa bahandi ni VP Sara ug mahimong importante nga basihan sa nagpadayong impeachment trial.