Nahimong init nga hisgutanan karon sa social media ang aktor nga si Baron Geisler human kini prangkahan sa iyang asawa nga si Jamie Evangelista nga mangita og sponsor alang sa iyang drug rehabilitation.
Nagsugod ang mga espekulasyon human nag-iwan og komento si Jamie sa Instagram post diin makita ang aktor nga nagpa-facial treatment. Sumala sa burado na nga komento, giingnan ni Jamie ang iyang bana nga mangita og drug rehabilitation sponsor nga makatabang kaniya sa pagsulbad sa gamut nga rason sa iyang mga problema, dungan sa pag-ingon nga dili kini basta-basta maayo sa facial treatment lang.
Gawas sa maong komento, nag-post usab si Jamie sa iyang Instagram Stories og mga makahuluganong quotes bahin sa “pag-usab” ug sa mga tawo nga nagpaka-biktima human makamugna og kadaot, diin gi-tag pa niini ang account sa aktor ug gihulagway nga “Best Actor”.
Tungod niini, duna’y kabalaka ug pagduda ang mga netizens nga tingali mibalik o nag-relapse ang aktor sa iyang daang bisyo. Sa pagkakaron, wala pa’y giluwatan nga opisyal nga pahayag si Baron kalabot sa kontrobersiyal nga mga post sa iyang asawa.