Nagduso na sa petisyon sa Korte Suprema karong adlawa ang PDP-Laban arong sa subling pag hagpat sa mga balota sa mga senatorial candidates sa milabay nga piliay.
Mismo si Atty. Israelito Torreon apil ang ubang petitioners ang miduso sa maong lakang aron subli nga iphon ang boto sa mga senatorial candidate sa national election 2025.
Nagtumong kini sa paghimo og manual re-count sa mga boto alang sa mga senador atol sa milabay’ng bugnong lugaynon.
Naglangkob usab kini og Motion for Leave to File Supplemental Petition for Mandamus, diin gahangyo sa Korte Suprema nga manduan ang Commission on Elections (COMELEC) sa pagpatuman sa manwal nga pag-ihap sa mga boto atol sa senatorial race.
Gipakita sa mga dokumentong gisumite ang ilang tinguha nga masuta og husto ba ang resulta sa eleksyon pinaagi sa manwal nga pag-ihap sa mga boto, aron masiguro ang integridad ug kredibilidad sa resulta sa natigayong eleksyon.
Sa pagkakaron, wala pa’y opisyal nga pahayag ang Korte Suprema ug ang COMELEC bahin sa maong petisyon. Padayon nga motutok ang publiko sa kahimtang sa isyu samtang naghulat sa posibleng aksyon sa Korte.