VALENCIA CITY — Giandam na sa panggamhanan sa Valencia City ang pagpatuman sa dako nga ₱209-million farm-to-market road project nga pondohan sa World Bank aron mas mapaspas ang kalamboan sa sektor sa agrikultura ug imprastraktura sa syudad.
Sa pakighinabi sa Bombo Radyo kang Valencia City Administrator Atty. Heinz G. Villanueva, gipahayag niini nga ipahigayon karong Hulyo 17 ang pre-procurement conference alang sa 8.3-kilometros nga dalan gikan sa Guinoyuran paingon sa Concepcion Junction pinaagi sa PRDP. Ang maong dakong proyekto kabahin gihapon sa gihingusgan nga pagpangandam sa dakbayan sa tinguha niini nga mamahimong usa ka Highly Urbanized City kun HUC diin positibo usab ang suporta sa lokal nga Chamber of Commerce.
Gawas sa mga bag-ong dalan, gilatid usab ni Villanueva ang uban pang agendang pampubliko sa administrasyon ni Mayor Azmi Galario lakip na ang pagpatuman sa regular nga surprise drug testing sa mga empleyado sa LGU ug ang pag-abag sa CADAC sa mga ordinaryong tiggamitan og droga nga boluntaryong mosurrender aron magpa-rehab. Operational na usab ang mibalhing City Hospital nga kasamtangang nagserbisyo sa kapin 200 ka mga outpatients matag adlaw diin gipakaon pa og libreng paniudto samtang naghulat sa ilang medikal nga pagsusi.