TALAKAG, BUKIDNON — Walay kaluoy nga gitigbas patay ang usa ka 17-anyos nga inahan sa iyang mismong silingan didto sa luyo sa Barangay Hall sa San Isidro Talakag Bukidnon niadtong Hunyo 28, 2026 sa hapon.
Sa pakighinabi sa Bombo Radyo Malaybalay kang PMSG. Jessie M. Sanico, ang investigator sa Talakag Municipal Police Station, nahitabo ang krimen human nabiyaan sa makadiyot sa iyang live-in partner ang biktima. Paglabay sa mga 15 ngadto sa 20 minutos, nakurat na lang ang bana sa iyang pagbalik human niya nakit-an ang iyang asawa nga wala na’y kinabuhi ug duna’y lalom nga samad-tigbas sa tangkugo gamit ang usa ka taas nga sundang.
Gipanghimakak usab sa kapulisan ang mga mikatag nga hungihong sa social media nga matud pa gilugos ang biktima. Giklaro ni Sanico nga base sa ilang imbestigasyon, wala hilabti ang menor de edad apan gipaubos gihapon kini sa swab test alang sa medikal nga pagsusi aron daling mapalong ang mga malisyosong istorya online.
Kasamtangang gilusad na ang hot pursuit operation sa mga otoridad inabagan sa mga force multipliers batok sa at-large nga suspetsado, samtang giandam na sa kapulisan ang pagpasaka og kasong murder batok kaniya.