Mikabat sa 47 ka mga suspek ang nadakpan sa 45 ka operasyon nga gipahigayon sa Bukidnon Police Provincial Office gikan Hunyo 22 hangtod 28 isip kabahin sa padayon nga kampanya batok sa nagkalainlaing matang sa kriminalidad sa lalawigan.
Sa pakighinabi sa Bombo Radyo, gipadayag ni Police Captain Sheila Joy Jangad, tigpamaba sa Bukidnon Police Provincial Office, nga lakip sa mga nahimong kalampusan ang pagdakop sa walo ka mga suspek sa illegal nga droga, dose ka wanted persons, ug pito ka mga nalambigit sa pagpamaligya og smuggled cigarettes.
Dugang pa niini, nagpadayon usab ang operasyon batok sa illegal nga armas, illegal gambling, illegal logging, illegal mining ug illegal fishing.
Matod ni Jangad, ang mga kaso batok sa mga nadakpan sa pagpamaligya og smuggled cigarettes ipasaka pinaagi sa Bureau of Customs human sa pagproseso sa mga spot report.
Gipasalig usab sa kapulisan nga padayon nilang palig-onon ang seguridad sa lalawigan pinaagi sa higpit nga checkpoint operations, ilabina sa mga border control points.