Gipaambit sa usa ka amahan ang kamahinungdanon sa papel sa ginikanan sa pagpadako sa ilang mga anak ug pagdumala sa pamilya.
Matud ni Alumier Agbalog, usa ka inspektor sa Rural Transit Mindanao Inc. (RTMI), nasabtan niini nga ang iyang labing dakong papel isip amahan mao ang pagtagana og pagkaon ug materyal nga mga butang alang sa iyang pamilya.
Labaw sa tanan, giisip niya nga iyang labing mahinungdanong tahas ang paggiya sa iyang mga anak aron sila modako nga responsable ug adunay kahadlok sa Ginoo.
Sa pikas bahin, gipasabot usab sa usa ka amahan ug pastor nga dako kaayo og importansya ang papel sa usa ka amahan sa pagtukod og usa ka diyosnon nga pamilya. Matud ni Pastor Richard Gorres sa Lakas Angkan Ministries Inc., nga ang usa ka diyosnon nga pamilya adunay dakong maayong epekto o impact sa katilingban tungod kay ang pamilya man ang giisip nga dako nga pundasyon o basic unit of society. Gipatin-aw niini nga kung hapsay ug maayo ang dagan sa pamilya, mamahimo usab nga maayo ug malampuson ang tibuok katilingban.