Naghiusa ang 8th Infantry (Dependable) Battalion (8IB) sa Philippine Army ug ang Office of the Vice President (OVP) sa paglusad sa programang “PagBabago” campaign, diin mokabat sa 1,500 ka school bags ang giapod-apod ngadto sa mga estudyante sa probinsya sa Bukidnon niadtong Hunyo 18, 2026.
Kini nga inisyatibo nagtumong sa paghatag og suporta sa edukasyon sa mga kabataan, ilabi na kadtong nagpuyo sa mga hilit nga komunidad.
Ang mga benepisyaryo naglangkob sa mga estudyante gikan sa napulo (10) ka tulunghaan sa Malaybalay City ug duha (2) ka tulunghaan sa lungsod sa Impasug-ong.
Gipangunahan sa OVP ang maong kalihokan, uban sa hugot nga suporta sa 8IB.
Sumala sa militar, kini nga programa usa ka pamatuod sa lig-on nga kolaborasyon tali sa gobyerno ug kasundalohan aron masiguro nga makab-ot sa kabataan ang ilang mga pangandoy pinaagi sa paghatag og igong kahigayunan sa ilang pag-eskwela.
Gipasalig usab sa 8IB nga padayon ang ilang suporta sa susamang mga programa sa umaabot.
Kini nga lakang kabahin sa ilang paningkamot nga mapalig-on ang kalinaw ug mapadali ang kalamboan sa mga komunidad sa ilang area of responsibility.