Duha ka managlahing aksidente sa dalan ang natigayon sa probinsya sa Bukidnon ning Sabado sa kadlawon, Hunyo 20, 2026, diin usa ang nakabsan sa kinabuhi samtang duha pa ang nangaangol human pulos malambigit ang mga drayber nga giingong ilawom sa ilimnong makahubog.
Sa Barangay Bangcud, Malaybalay City, gideklarang Dead on Arrival sa Bukidnon Provincial Medical Center ang usa ka 21-anyos nga drayber sa motorsiklo human kini nibangga ug napaslak ilalom sa usa ka Freightliner US Tractor Head nga gimaneho sa usa ka 38-anyos nga drayber takna alas-3:50 sa kadlawon.
Base sa imbestigasyon, gikan sa Valencia City ang biktima giingong mitipas sa linya sa maong truck padulong sa Davao City hinungdan sa kusog nga pagkabangga.
Sa laing bahin, takna alas-12:50 pa lamang sa buntag sa susamang adlaw, naangol usab ang usa ka 43-anyos nga drayber ug iyang 40-anyos nga babayeng angkas, human mabangga sa usa ka Mitsubishi Mirage G4 ang likod nga ligid sa ilang motorsiklo samtang nagbiyahe sa Sayre Highway, Poblacion, Valencia City.
Gidala gilayon ang mga biktima sa Bukidnon Provincial Hospital sa Maramag alang sa medikal nga pagatiman.
Sa pagsusi sa kapulisan, nasayran nga pulos ubos sa impluwensya sa alkohol ang drayber sa Mirage ug ang drayber sa motorsiklo sa insidente sa Valencia City, diin ang mga drayber nga nalambigit anaa na karon sa kustodiya sa nagkadaiyang alang sa tukmang disposisyon.