Gikuwestiyon sa labing taas nga negotiator sa Iran ang tinuod nga pasalig sa Estados Unidos alang sa mga lakang sa kalinaw human nagpahigayon og bag-ong mga pagpangatake ang Israel didto sa nasud sa Lebanon.
Tungod sa maong hitabo, nahanaw ang dakong kahigayonan nga mapirmahan sa Tehran ug Washington ang usa ka framework agreement nga gitumong aron unta tapuson ang nagpadayong giyera. Una nang naglaum si US President Donald Trump nga mapirmahan na ang maong kasabutan, apan nagduhaduha na karon ang Iran tungod sa kalit nga pagpangatake sa Israel sa habagatang bahin sa Beirut nga giingong target ang mga militanteng Hezbollah.
Matod ni Iranian negotiator Mohammad Baqer Qalibaf, ang maong aksyon nagpakita lamang nga kulang sa determinasyon o katakos ang Amerika sa pagpatuman ug pagtuman sa ilang mga saad alang sa kalinaw. Nagkanayon usab ang mga opisyal sa militar sa Iran nga dili pwedeng pasagdan lang ug siguradong duna’y saktong tubag ang maong gihimo sa Israel.