Gikumpirma sa Police Regional Office-10 (PRO-10) nga wala na sila’y namonitor nga bisan unsang aktibong organized crime group nga naglihok sa tibuok Northern Mindanao human hingpit nga nabungkag ang mga kanhing kriminal nga grupo sa rehiyon.
Matud ni PRO-10 Spokesperson Police Major Joann G. Navarro, kadaghanan sa mga lider niining mga sindikato nadakpan na sa mga operasyon, samtang ang nahabiling mga miyembro nagkabulag ug mibiya na sa rehiyon. Tungod niini, nawad-an na sila og kapasidad sa pagpahigayon og pagpanulis ug uban pang matang sa organisadong krimen.
Bisan pa man niini, gipasalig sa PRO-10 nga dili sila magkompiyansa ug padayon ang ilang intelligence monitoring uban sa laing mga law enforcement agencies aron babagan ang posibleng pagsulod sa mga criminal gangs gikan sa ubang rehiyon. Gihangyo usab ni Navarro ang publiko nga dinalian nga i-report sa kapulisan ang bisan unsang kadudahang mga tawo o kalihokan sa ilang dapit aron mapadayon ang kalinaw sa komunidad.