Kumpyansa si Department of Public Works and Highways (DPWH) Secretary Vince Dizon sa kabug-aton sa mga ebidensiya nga ipasaka batok sa igagaw sa presidente nga si Leyte Rep. Martin Romualdez.
Sa usa ka interbyu, gipangutana ang kalihim kon ngano nga wala pa gihapoy pormal nga kaso nga na-file batok kang Romualdez bisan pa man sa pagkalambigit sa iyang ngalan sa pipila ka mga resource person atol sa mga pagdungog sa Senado ug sa House of Representatives.
Sumala pa ni Dizon, nagpadayon ang legal nga proseso batok kang Romualdez ug segurado nga sa labing daling panahon, mapasaka na kini sa korte sama sa Sandiganbayan.
Masaligon ang kalihim sa kalig-on sa mga ebidensiya batok sa kanhi House leader, diin siya mismo ang nag-refer ug nagsumite niini ngadto sa Office of the Ombudsman niadtong Nobyembre 30, 2025.
Matud ni Dizon, nga ang mga ebidensiya mao usab ang nahimong basehan sa korte aron magpagawas og freeze order sa mga kabtangan sa igagaw sa presidente ug hingpit kining gidid-an nga makagawas sa nasud.
Gihatagan usab og gibug-aton sa kalihim nga bisan og daghan ang naghandum nga makit-an nga mapasakahan og kaso o mapriso ang kanhi House Speaker, kinahanglan gihapon nga moagi sa husto nga proseso ang maong kaso.
Gipasabot sa kalihim nga kinahanglan pinaagi ang dagan sa susamang proseso nga giagian sa mga kaso nilang Sen. Jinggoy Estrada ug uban pang mga kasamtangang nabilanggo tungod sa isyu sa mga flood control projects.