Gisuspende sa iyang katungdanan ang chief prosecutor sa International Criminal Court (ICC) nga si Karim Khan dungan sa nagpadayong imbestigasyon kalabot sa mga pasangil sa sexual misconduct batok kaniya.
Sumala sa pamahayag sa governing body sa ICC, ang maong lakang gihimo human sa gipahigayon nga imbestigasyon sa United Nations labot sa sumbong sa usa ka babayeng empleyado sa iyang buhatan kinsa nag-akusar kang Khan sa dili makiangayong pagpanghasi. Giklaro sa unahan nga ang maong suspensyon temporaryo lamang samtang nagpaabot sa pinal nga botasyon sa 125 ka mga member states sa korte aron desidihan ang iyang kapalaran, ug wala kini nagpasabot nga sad-an na ang piskal.
Hugot naman nga gipanghimakak ni Khan ug sa iyang mga abogado ang maong desisyon, diin gitawag nila kini nga ilegal, walay igong basehan, ug supak sa husto nga proseso sa balaod.