Miubos ngadto sa 4.7 porsyento ang unemployment rate o gidaghanon sa mga walay trabaho sa Pilipinas niadtong buwan sa Abril gikan sa 5 porsyento sa miaging Marso. Sumala sa Philippine Statistics Authority (PSA), kini nagpasabot nga anaa sa 2.41 ka milyon ka mga Pilipino ang nangita og trabaho sa maong buwan.
Bisan pa man niini, misaka usab ngadto sa 15.2 porsyento ang underemployment rate diin moabot ngadto sa 7.41 ka milyon ka mga mamumuo ang adunay trabaho apan nagtinguha pa og dugang kita o dugang oras sa pagtrabaho. Matod ni PSA Undersecretary Claire Dennis Mapa, ang padayong pagsaka sa presyo sa lana nakahatag og dako nga epekto sa mga sektor sa panagat ug transportasyon, partikular na sa mga drayber sa jeepney, taxi, ug Angkas, tungod sa kamahal sa gasolina ug diesel nga maoy nag-unang hinungdan sa pagtaas sa underemployment.