Padayon ang maayong kampanya ni Alex Eala human mapildi niini si Mananchaya Sawangkaew sa Thailand sa score nga 6-3, 6-2 aron makasulod sa semifinals sa Birmingham Open karong Sabado.
Bisan og nakasinati og lisod nga pagsugod batok sa Thai netter, nakuha ni Eala ang momentum sa duwa ug napasig-uli ang kontrol aron maseguro ang kadaugan sulod sa usa ka oras ug 21 minutos.
Sa ikaduhang set, nakalamang pa si Sawangkaew og 2-1 apan mibawi si Eala ug midaog sa lima ka sunod-sunod nga games aron mahuman ang duwa.
Mao usab kini ang nahitabo sa unang set diin nagtabla pa sa 1-1 ang duwa sa wala pa midaog si Eala sa upat ka sunod nga games aron makalabaw og 5-1 ug masira ang set sa 6-3.
Tungod sa maong kadaugan, duha na lamang ka kadaugan ang gikinahanglan ni Eala aron masungkit ang iyang ikaduhang WTA 125 title human sa iyang kampyonato sa Guadalajara niadtong miaging tuig.