Balhog karon sa bilanggoan ang usa ka traynta’y otso (38) anyos nga lalaki human kini malampusong nasakote sa gikasang drug buy-bust operation sa mga otoridad didto sa lungsod sa Impasugong, Bukidnon.
Sa opisyal nga report gikan sa Impasugong Municipal Police Station, natigayon ang maong operasyon didto sa Purok Nuwebe (9), Barangay Poblacion pasado alas-diyes singkwenta’y nuwebe (10:59) sa buntag niadtong Mayo 24. Narekober gikan sa posisyon sa suspetsado ang napulo’g upat (14) ka sachet sa gidudahang shabu nga motimbang og 1.12 gramos ug adunay street value nga mokabat sa pito ka libo, unom ka gatos ug katorse pesos (P7,616). Gawas sa droga, nasakmit usab sa mga operatiba ang usa ka cellphone, lima ka gatos ka pesos (P500) nga buy-bust money, ug usa ka motorsiklo nga walay plaka nga gigamit sa iyang ilegal nga aktibidad.
Sa pagkakaron, ang mga nakompiskang ebidensya dinalian nang gipadala ngadto sa Bukidnon Provincial Forensic Unit alang sa saktong eksaminasyon samtang gi-andam na ang kasong paglapas sa Republic Act 9165 o Comprehensive Dangerous Drugs Act batok sa dinakpan.