Duha ka balay naugdaw human gilamoy sa kalayo sa Malaybalay City; Usa ka batan-on nakaangkon og paso

Daling miulbo ug mikuyanap ang kalayo gumikan sa mga karton, plastik, ug light materials nga maoy hinungdan sa hingpit nga pagka-ugdaw sa duha ka balay pasado alas-otso sa buntag kagahapon, Mayo 21, sa Zone-4, Barangay Kalasungay, Malaybalay City. Base sa inisyal nga impormasyon, nagsumikad ang sunog gikan sa bodega sa usa ka balay nga duna’y mga sudlanan sa prutas.

Bisan pa man sa dinalian nga pagtinabangay sa mga residente nga buboan og tubig, paspas nga gikaon sa kalayo ang mga istruktura. Gumikan sa maong insidente, usa ka batan-ong 17 anyos ang dinalian nga gidala sa balay-tambalanan human nakaangkon og mga gagmayng paso sa kalawasan.Gideklara sa Malaybalay Fire Station nga fire out ang sunog pasado alas-otso singkwenta (8:50) sa buntag, samtang padayon pa ang gihimo nilang imbestigasyon aron matugkad kon unsay tinuod nga gigikanan sa maong kalayo.