Gipadayag sa pipila ka residente sa ikaduhang distrito sa Bukidnon ang ilang kasubo ug pagkadismaya sa desisyon ni Bukidnon 2nd District Representative Keith Flores nga pag-abstain sa impeachment vote batok kang Vice President Sara Duterte ug sa pagkakapili niini isip prosecutor sa maong kaso.
Sa pakighinabi sa Bombo Radyo Malaybalay, gipadayag ni Alyas Fernando nga para kaniya “atik-atik” lamang ang pag-abstain sa kongresista aron dili masuko ang mga botante sa Bukidnon, ilabina nga daghang katawhan sa Mindanao ang supak sa impeachment batok kang Duterte. Matod niini, mas angay unta tutokan sa gobyerno ang problema sa utang sa nasod ug pagsaka sa presyo sa mga palaliton kaysa sa isyu sa impeachment.
Samtang sa laing pakighinabi usab, gipahayag ni Alyas Rosalinda ang iyang pagkadismaya sa desisyon sa kongresista, ilabina nga nagtuo siya nga solidong nagsuporta ang Mindanao kang Duterte. Nadugang pa ang iyang kasubo human mapili si Flores isip prosecutor sa impeachment case.
Sa bahin usab ni Alyas Susana, iyang giingong daghang residente sa distrito ang nahiubos sa desisyon sa kongresista tungod kay murag wala matuman ang gusto sa katawhan nga iyang girepresentar. Matod niini, mas angay unta nga solusyonan sa gobyerno ang krisis sa ekonomiya ug price hike sa gasolina kaysa unahon ang impeachment nga posibleng adunay kalambigitan sa umaabot nga 2028 elections.