Emosyunal ug dako og pasalamat ang P-pop girl group nga BINI human sila giila sa Senado tungod sa ilang makasaysayanong performance sa international music festival nga Coachella.
Ang tanang walo ka miyembro sa grupo mitambong sa Senado niadtong Miyerkules diin giaprubahan ang Senate Resolution 370 ubos sa sponsorship ni Senador Bam Aquino.
Gipasiugda ni Aquino nga ang kalampusan sa BINI maoy ebidensya sa talento sa mga Pilipino sa international nga entablado.
Pipila ka mga senador lakip sila Joel Villanueva, Raffy Tulfo, Erwin Tulfo, Risa Hontiveros, Jinggoy Estrada, Loren Legarda, ug Kiko Pangilinan ang nagpahayag usab og suporta ug pag-ila sa grupo.
Sumala sa mga miyembro sa BINI, wala nila damha ang maong pagpasidungog ug labi silang na-overwhelm sa pagdawat gikan sa Senado.
Samtang, gipasiugda ni Hontiveros ang papel ni Mikha Lim sa pagpalambo sa mental health awareness ug safe spaces, ilabi na alang sa kababayen-an.
Nagpasalamat usab si Mikha sa pag-ila ug sa paghatag og pagtagad sa kaayohan sa mga artista.
Gipahayag sa grupo ang ilang panawagan nga palapdan pa ang suporta sa mga Pilipinong artist ug creatives, ug hatagan pa og daghang oportunidad ang OPM ug lokal nga talento sa global stage.