Nahimong tensyonado ang sesyon sa Senado human direktang gikuwestiyon ni Senator Rodante Marcoleta ang partial report sa Senate Blue Ribbon Committee bahin sa giimbestigahang flood control project scam.
Bisan sa pagdumili ni Senate Pro tempore Panfilo Lacson, nga chairperson sa komite, nga motugot og interpellation, mihangyo gihapon si Marcoleta kang Senate President Vicente Sotto III aron makapadayag sa iyang manifestation.
Sa pamahayag, sigon ni Marcoleta nga kinahanglan makompleto ang report gumikan dugay na kining gihulat sa publiko.
Gipunting niini nga ang nadawat nga report usa lamang ka digital copy ug wala’y pirma sa chairman.
Gikuwestiyon usab niini nga wala giimbitar sa komite ang ubang mga personalidad nga giingong nalambigit sa alegasyon, sama nila ni kanhi House Speaker Martin Romualdez, kanhi Governor Luis “Chavit” Singson, ug mga opisyal sa DPWH nga sila si Undersecretary Adrian Bersamin ug Undersecretary Jojo Cabis.
Tubag ni Lacson, ang gipadala ngadto sa mga senador mao ang opisyal nga soft copy sa partial report.
Gipatin-aw usab niini nga ikaduha nang giimbitar sa komite si kanhi House Speaker Martin Romualdez ug uban pang miyembro sa House of Representatives, apan wala sila mitambong isip pagtamod sa inter-chamber courtesy.
Gidugang pa ni Lacson nga sila lamang nila Rep. Toby Tiangco ug Rep. Leandore Leviste ang boluntaryong mitambong sa mga pagdungog.
Gipahinumduman usab nga walay miyembro sa Kongreso nga mahimong ipailalom sa subpoena sa bisan unsang chamber.
Sa pagkakaron, wala pa’y gipahibalo nga sunod nga iskedyul alang sa pagpadayon sa imbestigasyon sa maong isyu.