Gi-aprubahan sa House Committee on Justice ang committee report nga nag-ingon nga adunay “probable cause” sa mga impeachment complaints batok kang Bise Presidente Sara Duterte.
Nagkahiusa sa pagboto ang tanang 55 ka mambabalaod nga mitambong sa House Committee on Justice pabor sa mosyon nga may kalabutan sa nagpadayon nga deliberasyon.
Ang unanimous vote nagpakita sa lig-on nga suporta sa mga miyembro sa komite sa maong lakang isip kabahin sa ilang proseso sa paghisgot sa mahinungdanong isyu.
Nakita sa komite nga adunay igo nga basehan aron ipadayon ang proseso sa impeachment. Ang maong lakang kabahin sa constitutional process diin gisusi sa Kamara ang mga reklamo sa dili pa kini pormal nga ipasaka sa plenaryo alang sa desisyon.
Gipasiugda ni House Committee on Justice Chairperson Rep. Gerville Luistro nga ang kamatuoran ug hustisya ang kinahanglan mopatigbabaw sa paghisgot sa impeachment complaint batok kang Bise Presidente Sara Duterte.
Matud ni Luistro, walay bisan kinsa nga labaw sa balaod bisan unsa pa ang posisyon o gahom niini.
Gipasiugda usab niini nga importante nga makita sa sunod nga henerasyon nga adunay accountability sa gobyerno.
Sumala ni Luistro nga kon adunay sala ang Bise Presidente, ang kamatuoran maoy mopamatuod niini.
Apan kon wala, ang legal nga proseso usab ang molimpyo sa iyang ngalan.