Gipasiugda ni ML Party-list Rep. Leila de Lima nga dili angay manghilabot ang Korte Suprema sa proseso sa impeachment nga ginapadagan sa Kongreso.
Matud ni de Lima, kinahanglan adunay judicial restraint ang Korte Suprema gumikan ang House Committee on Justice nagatuman sa iyang mandato ug adunay exclusive power sa pagsugod sa mga kaso sa impeachment.
Naglaom usab ang mga mambabalaod nga dili magpagawas og Temporary Restraining Order ang Korte Suprema aron dili mapugngan ang pagproseso sa mga impeachment complaint batok kang Bise Presidente Sara Duterte.
Gihangyo usab ni De Lima ang liderato sa Senado nga dayon aksyunan ang Articles of Impeachment sa higayon nga ma-transmit na kini gikan sa Kamara.
Sumala kaniya, klaro sa Konstitusyon nga sa dihang madawat sa Senado ang Articles of Impeachment, kinahanglan dayon ipadayon ang impeachment trial.