Hugot nga gipahimangnoan sa Department of Labor and Employment (DOLE) Bukidnon ang mga pribadong kompanya nga dili ibaliwala ang gipatuman nga ₱14.00 nga usbaw sa suholan. Sumala ni Senior Labor Officer Reyna Tagailo, ang Senior Labor and Employment Officer sa DOLE-Bukidnon Provincial Field Office, na matod pa magsugod na ang ilang mga labor inspectors sa paglibot sa tibuok probinsya aron sutaon kon kinsa ang wala nagtuman sa maong Wage Order. Ang maong mando prayoridad alang sa mga establisyimento nga adunay kapin sa napulo ka mga trabahante.
Giklaro ni Tagailo nga ang maong umento sa suholan niagi sa mabinantayong wage hearing diin aktibong nisalmot ang kampo sa management ug mga trabahante aron makab-ot ang makiangayong kasabutan. Nasayod na ang kadaghanan sa mga kompanya sa Bukidnon mahitungod sa maong kausaban human ang gipahigayon nga mga serye sa dayalogo ug wage meeting sa wala pa ang pormal nga pag-apruba sa maong kamanduan.
Pinaagi sa regular nga inspeksyon, tinguha sa DOLE nga masiguro ug masuta kon hugot ba gayod nga napatuman ang pagpasaka sa minimum wage rate sa tibuok probinsya aron maprotektahan ang katungod ug kaayohan sa mga mamumuo.